Ný GSM stöð frá Vodafone var gangsett í Landeyjahöfn nokkru áður en siglingar Herjólfs færðust þangað úr Þorlákshöfn, þann 20. júlí. Farsímanotkun á svæðinu mun aukast verulega við opnun hafnarinnar og því var nauðsynlegt að auka afkastagetu kerfisins. Þörfin verður mest í kringum verslunarmannahelgina, þegar þúsundir Þjóðhátíðargesta sigla milli lands og Eyja.

Þess má einnig geta að færanleg GSM símstöð Vodafone (sérútbúin kerra) er komin til Eyja, en hún er gjarnan gangsett þar sem von er á miklu fjölmenni til að tryggja okkar viðskiptavinum gott GSM samband þar sem álag á símkerfið er óvenju mikið í stuttan tíma í senn. Færanlega símstöðin verður að sjálfsögðu prófuð ítarlega áður en Þjóðhátíðin gengur í garð, en afkastageta hennar hefur verið tvöfölduð frá því í fyrra sem kemur sér vel þar sem búist er við metfjölda gesta á Þjóðhátíðina í ár.

Sumarbústaðaeigendur í Skorradal geta nú orðið náð útsendingum Digital Ísland í Skorradal. Endurvarpssendir er kominn upp sem staðsettur er við stífluhús Andakílsvirkjunar og næst merki hans vel inn dalinn. Mælingar sýna að þegar komið er innst í dalinn þar sem ekki er lengur sjónlína má samt ná merki frá endurvarpssendinum ef notaður er loftnetsmagnari. Stór hluti sumarbústaða í dalnum nær þessu merki þó án magnara. Sendingin er á UHF rás E29. Sjónvarpsdagskrár á þessum sendir eru: RÚV / Stöð 2 / Stöð 2+ / Stöð 2 Bíó / Stöð 2 Extra / SkjárEinn / Stöð 2 Sport / Stöð 2 Sport 2  og hljóðvarpsdagskrár: Bylgjan / X-ið / Létt Bylgjan.

Síminn hefur ákveðið að ráðast í umfangsmikla uppbyggingu sem felur í sér breytingu á Breiðbandi Símans yfir í Ljósnet Símans. Þetta þýðir að á næstu tveimur árum verði um 40 þúsund heimili á höfuðborgarsvæðinu tengd við svokallað ljósnet Símans.  Þetta er bylting fyrir neytendur sem munu nú fá aðgang að allt að 100 Mb hraða á sekúndu á mjög góðu verði. Á einungis tveimur árum mun þessum fjörutíu þúsund heimilum gefast kostur  á margföldum Internethraða og háskerpu-, gagnvirku sjónvarpi svo fátt eitt sé nefnt.
Meðfylgjandi mynd sýnir áætlaða uppbyggingu á Ljósneti Símans. Á þessu svæði eru um 60 þúsund heimili en 40 þúsund heimili munu eiga kost á því að tengjast Ljósneti Símans. Sjá nánar á vefsíðu Símans.  Sjá einnig stærra kort með því að klikka á myndina.

Póst- og fjarskiptastofnun hefur afturkallað tíðniheimild farsímafyrirtækisins IceCell fyrir GSM 1800 farsímanet frá árinu 2007.  Tíðniheimildin er afturkölluð vegna vanefnda fyrirtækisins á að standa við skilmála heimildarinnar, sem kvað á um uppbyggingu farsímanets í áföngum fyrir tiltekin tímamörk. Í frétt sem birtist á mbl.is árið 2007 kom fram að fjarskiptafyrirtækið Icecell sé hefja vinnu við uppsetningu á sendum og öðrum búnaði og fyrirhugar að að hefja rekstur þjónustu sinnar í ársbyrjun 2008. Hafði Icecell gert samning við Mílu ehf. um hýsingu á búnaði.
Icecell hafði í hyggju að ná til 98% landsmanna með GSM dreifikerfi sínu. Icecell er í eigu svissneskra aðila og eru höfuðsstöðvar þeirra á Íslandi á Flugvallarvegi í húsnæði Flugbjörgu. Í svari IceCell við fyrirspurn frá Póst- og fjarskiptastofnun á síðasta ári kemur fram að fjármálakreppan á Íslandi hafi spillt áformum IceCell frá upphafi.

Sjá nánar á síðu Póst- og fjarskiptastofnunar

Nýr sæstrengur, sem tengir saman Ísland og Evrópu, var tekin í notkun í dag þegar Vodafone opnaði fyrir umferð viðskiptavina sinna um strenginn. Um er að ræða sæstreng milli Íslands og Danmerkur, svokallaðan Danice-streng, sem nýlega var lagður milli landanna. Strengurinn tryggir aukið öryggi í gagnaflutningi til og frá Íslandi auk þess sem netsamband við umheiminn verður bæði hraðara og enn tryggara en áður. Vodafone er fyrsti notandi nýja sæstrengsins.
Með tilkomu Danice-strengsins hefur Vodafone tryggt sér fjórar mismunandi gagnatengingar við umheiminn, sem tryggir meira samskiptaöryggi en önnur fjarskiptafyrirtæki á Íslandi. Hinir sæstrengirnir eru Farice-1, sem liggur milli Íslands, Færeyja og Skotlands, Cantat-3 sem tengir Evrópu og Kanada, og Greenland Connect sem tengir saman Ísland, Grænland og Kanada.

Ef allar upplýsingar Internetsins væru skrifaðar í bækur mundi bókastaflinn geta náð tíu sinnum frá Jörðinni til plánetunnar Plútó. Allar myndirnar okkar og ótrúlegt magn af nettengdum öryggismyndavélum hafa valdi svo mikilli aukningu á gögnum Internetsins að það hefur nú náð 486 GigaByte. Hinar stafrænu myndavélar sem gera okkur mögulegt að sýna myndir á Netinu valda mikilli gagnaaukningu. Og vegna þess að farsímarnir eru í auknu mæli að tengjast Internetinu, kemur fram í framtíðarspám bandarísku rekstrarfyrirtækjanna IDC og EMC að gagnamagnið mun tvöfaldast á næstu 18 mánuðum.
Þegar þessi fyrirtæki mældu fyrst umfang Internetsins árið 2007 fundu þeir út að gagnamagn Internetsins væri um 161 milljarðar GigaByte, en það hefur nú vaxið upp í tæpa 500 milljarða GigaByte. Rúmlega 70% af gögnunum koma frá einstaklingum, þ.e. tölvupóstur, símtöl, bankavinnsla, myndaalbúm o.fl.  Efni frá almenningi og sú þróun að farsíminn er í vaxandi mæli farinn að tengjast Internetinu hefur veruleg áhrif til aukningar gagna á Netinu.
Fyrirtæki og stofnanir geyma mikið gagnamagn á Netinu og þar af er um 30% af gögnunum kóðað, t.d. banakaupplýsingar. IDC og EMC reikna með að slíkar upplýsingar aukist mikið og kóðuð gögn verð um 45% af gögnum fyrirtækja árið 2012. Í þessari rannsókn kemur einnig fram að heildar árlegur kostnaður við vélbúnað Internetsins, þ.e. í tölvum, netbúnaði o.fl. sé um 800 billjónir króna. 

Farsímasala dróst saman um 9,4% á fyrsta ársfjórðungi og er útlit fyrir að salan dragist saman um 4,2% í ár. Er það í fyrsta skipti í meira en sex ár sem salan dregst saman, samkvæmt upplýsingum frá Gartner rannsóknarfyrirtækinu. Alls seldust 269 milljón farsímar á fyrsta fjórðungi ársins.
Þrátt fyrir samdrátt í farsímasölu þá jókst sala á svokölluðum „smartsímum" um 12,7%. Með þeim símum er hægt að vafra á netinu og horfa á myndbönd. Alls seldust 36,4 milljónir slíkra síma í fjórðungnum.
Enn og aftur seldi Nokia flesta farsíma á tímabilinu en alls seldust 97 milljónir Nokia farsíma á fyrsta ársfjórðungi. Hins vegar dregst markaðshlutdeild félagsins saman, úr 39,1% á fyrsta ársfjórðungi í fyrra í 36,2% á sama tímabili í ár. Samsung er í öðru sæti listans með 19,1% markaðshlutdeild sem er aukning úr 14,4% á fyrsta fjórðungi ársins 2008.